मी कोण?
खरंच मी कोण आहे? असा प्रश्न पडतो, तेव्हा माझ्या
बद्दलच्या या प्रतिक्रिया लक्षात घेणे गरजेचे होऊन बसते.
" तू ना खूप भोळा आहेस. अरे तुझ्या स्वभावाचा
सगळे फायदा घेतात हे तुला कळत नाही.' – इति आई.
'' लॉलीपॉप आणून देते तुला एक. रुद्रापेक्षाही
लहान आहेस तू.'' – अर्थातच बायको.
'' बघ तू काय तो योग्य निर्णय घे. मला तुझ्या
क्षेत्रातलं काहीच कळत नाही." – वडील
'' पक्का व्हीम्जीकल आहेस, येथे काम करताना तुझ्या
सगळ्या व्हीम्स बाजूला ठेव.'' – एक संपादक
'' रोज देवाजवळ दिवा लाऊन एक माळ जप करावा. '' –
आजोबा ( आईचे वडील )
'' जोश्या तू तर आपला मित्रहे'' – मामा
'' हां ! काही पण सांगतो का '' – बहिण.
''... पण काही म्हण तू एका जागी टिकू शकत नाहीस.
आपले नाव प्रयोग नाही, तर रिसल्ट असायला हवे'' – एक साहित्यिक संपादक
'' माझा बच्चूये गं तो'' – मावशी
'' ए हिऱ्या...'' – आजी (वडिलांची आई )
'' पंक्या तू खूप स्वार्थी आहेस'' – एक
दिवंगत मित्र
'' देखो, मै कौन हुं ये जब तक पता न चलता, तब तक
शादी न करना '' – तपोवनात भेटलेला साधू .
'' ये चल ना यार, थोडा वेळ झोपू ना एकत्र'' – कॉलेजच्या
जमान्यात बसमध्ये भेटलेला एक गे प्रवासी .
'' हमरे पंकज...'' – कुंभमेळ्यातील साधू
'' पंक्या, वाईट वाटून घेऊ नको पण तुला बोलायचं धोरण
नाही ये '' – एक जिवलग मित्र.''
'' ये बालक तो बहुत पराक्रमी है ''- कुंभमेळ्यातील
आणखी एक साधू.
'' तू लोखंड लागून किंवा एखाद्या अक्सिडेंटमध्ये
मरणार बहुतेक'' – काही वर्षांपूर्वी मला बिनपगारी राबवून घेणारा एक ज्योतिष
अभ्यासक.
'' दादा मला खूप आवडतो''- माझी एक गोड छोटी बहिण.
'' तू विमानतळावर असा घाबरून का वागत होतास '' –
एक आंतरराष्ट्रीय सामाजिक कार्यकर्त्या.
'' आधी हे काय लिहिले ते वाचून दाखव, मग तुला
मार्क देतो.'' – रसायन शास्त्राचे प्रोफेसर.
'' पुन्हा कागदाचा पिशव्या विकताना दिसला तर
तंगडे तोडील '' – कागदी पिशव्या विकणारी एक खडूस म्हातारी.
'' बाब्बा माझ्या '' – मुलगी.
'' तुम्हाला काहीच इच्छा नाही म्हणता, पण तुम्ही
अहंकार सोडला आहे का? – माझे सद्गुरू.
'' आमच्या जर्न्यालिसम डिपार्टमेंटचा हिरो '' – एक
वर्गभगिनी.
'' मेहनत करावी लागती तेव्हा पैसे मिळतात '' –
काका.
'' तू पत्रकार म्हणून चांगलाये, पण तुला व्यवहार
कळत नाही '' – माझ्याकडून खंडणी उकळणारा एक गुंड.
'' पन्क्या तू नक्की चारचाकी घेणार '' – मावस
मामा.
'' उद्या माझ्या बायकोचा फोटो आला पाहिजे बातमीत ''
– मला पैसे देण्याचा अपयशी प्रयत्न करणारा एक आदर्श शिक्षिकापती.
'' दादा तू व्हाटस अपवर का नसतो '' – माझी एक टेकनोसाव्ही
बहिण.
'' तुम्ही चाळीशीनंतर नक्की बियर घ्याल '' – एक
दिवंगत थियेटर मालक.
'' शानपना करतो का? प्रक्टिकलनंतर बाहेर भेट, मग
सांगतो '' – एफ. वाय. बी एस्सीचा एक सोबती.
'' हा हिऱ्याचा हार आणि ही तुळशीची माळ, काय
पाहिजे यातले तुला '' – स्वप्नात भेटलेला अवलिया.
'' मी पण तुझ्यावर प्रेम करते, हे नाही कसे म्हणू
'' – प्रेयसी
'' तू ही चिट्ठी वाचशील तेव्हा मी या जगात नसेल
'' – एक दिवंगत जिवलग मित्र.
'' वेबसाइटवरील लोकांशी आयुर्वेदाबद्दल चाटिंगची
कल्पना चांगली आहे, पण त्यामुळे आमच्या आयुर्वेदिक उत्पादनांचा खप वाढणे गरजेचे
आहे – पुण्यातील एक फ्यामिली आयुर्वेदाचार्य.
*** आणि***
'' कोण आहोत आपण? आपल्या जन्माचा उद्देश काय?
मेल्यावर मी कसा दिसेन'' – इति मी.
मी कोण हे शोधण्यासाठी मला आतापर्यंत जगलेल्या
बऱ्याच गोष्टी सांगाव्या लागतील. त्या तुम्हाला ब्लॉगवर सांगाव्या असे ठरवलेय आता.
टिप्पण्या